No marco das accións de sensibilización do programa O Noso Espazo, sumámonos á conmemoración do Día da Atención Temperá, que se celebra o vindeiro 16 de xuño baixo o lema «A hora do recoñecemento profesional». Con esta iniciativa, a entidade busca visibilizar e poñer en valor o compromiso de todas as persoas profesionais que acompañan diariamente ás nenas, nenos e ás súas familias nesta etapa crucial do desenvolvemento.

A Atención Temperá conta xa cunha traxectoria consolidada en España. Tras fitos históricos como a publicación do Libro Branco no ano 2000 , o recente acordo estatal para a mellora do sector (2025) e o desenvolvemento dun sistema unificado de estándares de calidade en 2026, o foco sitúase agora no factor humano. Como reflicte o manifesto do Grupo de Atención Temperá (GAT), as familias identifican este servizo esencial directamente co «nome e apelidos» das e dos profesionais que coordinan cada caso, máis alá dos modelos asistenciais concretos que se utilicen.

Por este motivo, dende o programa O Noso Espazo quérese destacar o conxunto de competencias e calidades humanas que definen a esta profesión e que fortalecen o vínculo diario coas familias:

• Comprensión e afecto: O coñecemento profundo do desenvolvemento infantil e a importancia da vinculación afectiva en cada etapa.
• Escoita e redes de apoio: A disposición permanente para o diálogo, o traballo en equipo e a construción de redes sociais de soporte.
• Respecto absoluto: A consideración e respecto por todas as persoas, independentemente da súa situación, idade, xénero, raza ou condición.
• Empatía e tempos: A atención constante ás preocupacións e ilusións das familias, respectando sempre os seus ritmos, tempos e decisións.
• Sensibilidade infantil: Unha mirada proactiva cara á riqueza expresiva da infancia e cara á profundidade dos seus xogos.
• Confianza e contorna: O cultivo de relacións estables e continuas , xunto cun coñecemento profundo da realidade social e dos recursos públicos dispoñibles en materia de saúde, educación e coidado na primeira infancia.

Despois de 25 anos de traxectoria da Federación Española de Asociacións de Profesionais da Atención Temperá, este 16 de xuño convértese nunha data idónea para que familias e profesionais unan as súas voces. 

O programa O Noso Espazo é inanciado pola Consellería de Cultura, Lingua e Xuventude da Xunta de Galicia dentro da convocatoria de subvencións destinadas

á realización de programas de interese xeral para fins de carácter social dirixidos á xuventude e ao voluntariado, con cargo á asignación tributariado 0,7 % do imposto sobre a renda das persoas físicas e do imposto de sociedades para o ano 2025.