O CDR Portas Abertas retoma en setembro a súa programación no medio rural tras a pausa estival, co impulso de Aldeas Activas e dos programas de voluntariado. A entidade encara a recta final do ano despois de superar as 1.500 persoas beneficiarias en 2025.

O Centro de Desenvolvemento Rural (CDR) Portas Abertas retoma este mes de setembro a súa programación no medio rural tras a habitual pausa estival. A entidade afronta esta nova etapa reforzando o seu compromiso coa veciñanza e impulsando a participación social a través dos seus programas de voluntariado —Implícate na túa comunidade e Voluntariado Ambiental— e da consolidación de iniciativas clave no territorio.

Aldeas Activas medra na comarca de Verín

Entre os proxectos que volven á actividade destaca Aldeas Activas, que conta xa con grupos de traballo consolidados en diversas aldeas da comarca de Verín. Este outono ábrense grupos nas seguintes localidades:

• Arcucelos
• Gondulfes
• A Bemposta
• Vilardecervos
• Ábedes
• A Rasela
• Matamá

Este programa, deseñado para combater a soidade non desexada e fomentar a autonomía das persoas maiores mediante obradoiros de memoria e psicomotricidade no seu propio contorno, converteuse nun alicerce para a vida comunitaria da comarca.

Quince programas de impacto social

Estes proxectos forman parte dun paquete de 15 programas de impacto social que o CDR Portas Abertas desenvolve ao longo deste 2026. A oferta abarca dende a atención á dependencia e o apoio a familias coidadoras (Vou Contigo, Cos meus) ata a conciliación e o lecer educativo (Concilia Rural, O Noso Espazo), pasando pola inclusión, a igualdade de xénero (DELAS) e a atención á diversidade (Galicia Acolledora).

• 1.556 persoas beneficiarias na última edición, de todas as idades
• 15 programas de impacto social en marcha durante 2026
• 7 novos grupos de Aldeas Activas este outono

A continuidade deste labor é posíbel grazas ao financiamento da Consellería de Política Social e Igualdade da Xunta de Galicia. Coa volta á rutina outonal, o CDR Portas Abertas fai un chamamento á participación veciñal e ao voluntariado para seguir construíndo un rural vivo, inclusivo e con servizos dignos para todas as etapas da vida.

Programas financiados pola Consellería de Política Social e Igualdade da Xunta de Galicia dentro da convocatoria de subvencións destinadas á realización de programas de interese xeral para fins de carácter social, con cargo á asignación tributaria do 0,7 % do imposto sobre a renda das persoas físicas e do imposto de sociedades para o ano 2025.