Este 8 de marzo, Portas Abertas pon o foco na necesidade de reactivar o diálogo sobre o feminismo.

Segundo o último informe de Fad Juventud, o apoio ao movemento entre a mocidade caeu ao 38,4%, e case a metade considera a loita pola igualdade unha «ferramenta de manipulación».

Ante estes datos, a entidade reafirma que a educación e a visibilidade son as únicas vías para combater a desinformación. A través dos seus programas, Portas Abertas traballa diariamente para demostrar que o feminismo non manipula, senón que libera e crea pontes.

Recentemente, o programa Galicia Acolledora realizou un obradoiro de intercambio cultural onde a figura de Rosalía de Castro serviu de nexo co feminismo árabe e referentes como Malala Yousafzai. Neste espazo, mulleres migrantes compartiron vivencias, unindo as súas historias por enriba das fronteiras.

Pola súa banda, o Programa DELAS continúa impulsando o empoderamento das mulleres no rural, atacando directamente as fendas de soidade e falta de recursos que aínda persisten na nosa contorna.

Convocatoria 8M

Para transformar a reflexión en acción, Portas Abertas convida a toda a veciñanza a sumarse á mobilización institucional:

Cita: Domingo, 8 de marzo.

Hora: 12:00 h.

Lugar: Praza do Concello de Verín.

É o momento de recuperar os espazos públicos e demostrar que a unión entre mulleres é a base dunha sociedade máis xusta.